لقاء مع المستحيل حمد المناعي من دولة قطر .

بـــــــــــــــأخـــــــــــــــــــتصـــــــــــ ار

حديث اليوم عن رحله قمت بها أنا والشباب إلى دولة قطر

حيث توجهنا خلال هذه الرحله إلى بعض الأشخاص المهمين

والذين تم عمل معهم اللقاء سابقآ وطرحه في المنتدى بقلم بنت الإمارات

وهــــــــــــــــــــــــــــــــــــم
الأخ/ على المنصوري …….. الأخ/حسين الساده
جزاهم الله خير على حسن الأستقبال وكرم الضيافه

ولكن اليوم الحديث يختلف والكتابه تختلف وكذلك روعة المنظر
الذي تمت مشاهده تختلف ؟
فما وجدناه بهذا المكان ليس بالمتوقع
شئ أكثر بكثير من ذلك
أنه
المربي المتصدر في الصداره صاحب الذوق الرفيع والنظره البعيده

-المستحيل-

حمد المناعي (العنبري)
هذا الرجل قمه بالأخلاق والتواضع
الذي يملك من الحلال مالايملكه غيره من مستويات فاخره وأنواع مختلفه ومميزه
ولكن حديثنا معه اليوم عن الصومالي فقط
الذي يملكه والذي أبدع بتربيته وتوصيله إلى مرحله
يعجز اللسان عن وصفها

سوف تشاهدون
بالفعل تميز هذا المربي المميز
حيث كان الحيث معه مشوقآ
جـــــــــــــــــــــــــــــــــدآ

س_متى وكيف كانت بداية تربية الحلال ؟

ج_بداية الحلال بصورة عامة من الطفولة كان عندنا في حوش البيت حلال كوكتيل
لي يسمونه غنم الفريج ومنها تعلمت بداية التركببات ودور الفحل في المراح
في بداية الثمانينات بديت اهتم بالصنف وكان وقتها الصنف على قدنا مافيه التطوير الحالي
اما بدايتي في البربر كانت في بداية التسعينات كنت من اول الناس اللي شروا من غنم الشيخ عبدالله بن خالد
وكانت كمية قليلة وماكان معاها فحل في البداية وولدت وحدة منهم وفحلت ولدها
وفترة الانتظار كنت افك فحل عربي وابادل بالانتاج المخلوط مع بربر اصلي لين كبر الطلي
واستفحل لكن ماستمريت فيها وبعتها كلها وكانت روسها سود ومن ثلاث سنين
رحت حق اخوي احمد بن سعد النعيمي اللي انا اعتبره الممول لي ومهما وصل مراحي من مستوى يتم فرع من مراحه
وشريت من عنده العدد الاكبر اللي اسست به الموجود وكان الداعم المعنوي لي
هو اخوي وحبيب قلبي حسين بن احمد السادة بعد نصبت عليه وخذت من عنده كم راس بالمقايضة
وعشان اخذ شوهات ثنتين روسهم حمر من عند عمي شريت له بالمقابل عشر روس سود بدالهم لان الروس الحمر ماكانت متوفره
وثنتين طرشهم لي هدو أخوي على بن محمد الكواري أول ماسمع أني قاعد أسس مراح بربر روس حمر.

س_ نذهب للحديث عن الصومالي أو البربري :
يقال أن أصله من الصومال وينتج من أستراليا وأفريقيا ، ما رأيكم في هذا الكلام وماهو أصل البربري الحقيقي ؟

ج_على حسب معلوماتي وعلى ماذكر في اخر السبعينات كانت اول مره اشوف فيها البربري
وكان عبارة عن خرفان ذباح يشترونها بثمانين او تسعين ريال في ذاك الوقت
وكانوا الشيبان يقولون انها من الصومال كانوا يشترونها قبل رمضان ويسمنونها وكانت كلها روس سود مافيها الالوان الموجودة حاليا .

س_ رغم أن فيه نسبه عاليه من الدهون إلا أن طعمه مميز ، ما رأيكم في ذلك ؟

ج_أنا شخصيا احب لحمته والطلب عليه عندنا في قطر قاعد يزيد بصورة كبيرة ولله الحمد.

س_كونه مرغوبا عند بعض المربين ما الفائدة المرجوة منه أم أنها للهواية فقط ؟

ج_مثل ماقلت من قبل لحمته صارت مرغوبة بشكل كبير بالاضافة انها هواية وانا دايما اسميها الغنم المبروكة لانها ماتتعب المربي مثل الانواع الثانية.

س_ما المواصفات الجمالية التي تؤخذ في الاعتبار ؟

ج_بالنسبة لي في صفة اساسية احبها في كل انواع الحلال وهي العرض
اما في البربر طبعا اللون صفة جمالية مهمة وحجم الراس وفناخة والملبة وشقة الظهر ورسمة الكفل
واهم شي التناسق الكلي في جميع انواع الحلال.

س_ ما هي أجمل الألوان ؟

ج_انا شخصيا احب اللون الاحمر بدرجاته في البربر والحين عندي انتاج بيرشن احمر .

س_كيف هو تأقلمه مع جو الخليج ؟

ج_تأقلمة اكثر من ممتاز وامراضه قليلة بفضل الله.

س_وكم عدد مرات الولادة في السنة ؟

ج_مثل ماقلت غنم مبروكه وتلد مرتين في السنة وفيها نسبة توائم كبيرة .

س_ ماهي مشاكل تربية هذا النوع ؟

ج_مافي اي مشاكل ملحوظة في التربية لكن في مشكلة صغيرة عندنا في قطر وهي من العادات والتقاليد وبدت تروح تدريجبا
واتغير الفكرة وهي ان البربر ماينذبح كرامة للضيف وحاليا يذبحونها في العزايم المحفوفة او شغل ودام ثلاجة.

س_ هل كمية الحليب تكفي الصغار بحالة الأنتاج يكون تؤم ؟

ج_عندي تكفي وزيادة وتقوم بعيالها وتسويهم ونادر تلقى فيهم طلي ضعيف وغالبا يكون بسبة مرض عابر ولله الحمد.

س_ وهل يمكن تربيته أو تهجينه مع نوع أخر ؟

ج_انا اتوقع ان البربر مهجن وخالص والله اعلم وصعب وشبه مستحيل تحصل شي من انواع الحلال في الوقت الحالي لم يدخل فيه تهجين
وفي ناس هجنوا البربر مع السوري وناس فكوا البربر مع العربي وعلى حسب معلوماتي خلطوه بالكاميرون شيب
ومافي مشكلة من التهجين لو بيعطينا شي احسن وافضل في المواصفات.

س_حاليا هل تفكر بالبيع سواء من الفحول أو الأمهات أو الانتاج ؟

ج_بخصوص الانتاج من الاناث مافكر في البيع حاليا لكن بعت من قبل واحيانا يطلع عندي لو مابيه افتح عليه مقايضة
او نظام من سبق لبق عشان اتحكم في اللون
اما بخصوص الطليان اغلبهم انا استهلكهم في الاكل وبعت طليان بيرشن.

س_كم تتراوح الأسعار عندكم حاليا في قطر؟

ج_الاسعار تختلف على حسب اللون والمواصفات وتبتدي تقريبا من الف وخمس وممكن توصل لي العشرة وزيادة على حسب الرغبة
عندي فحل بيرشن وصل عليه السوم حاليا مائة الف ريال.

س_أي معلومات أخرى تحب أضافتها وصور حصرية للقاء ؟

ج_اشكركم على الاستضافة والاجوبة كانت وجهة نظر شخصية تحتمل الصواب والخطأ واتمنى اكون عند حسن ظنكم.

أتمنى أنكم حضيتم معنا بتقرير من أجمل اللقاءات
مع المتصدر بالمقام الأول من حيث
الصنف والمستوى الفاخر

الله يبارك له فيما يملك

وأذكرو الله